بنوں (نیشن رپورٹ) بنوں میں نامعلوم افراد نے ایک خاتون پولیو ورکر کو فائرنگ کر کے ہلاک کر دیا۔ تفصیلات کے مطابق پولیو ورکر فہمیدہ یاسمین کو کنٹونمنٹ پولیس سٹیشن کی حدود میں نشانہ بنایا گیا۔ پولیس ذرائع کا کہنا ہے کہ فہمیدہ سرکی زبتا خان اپنے رشتے داروں سے ملنے گئی تھی وہ واپس اپنے گھر آ رہی تھی کہ مسلح افراد نے فائرنگ کر دی۔ فہمیدہ یاسمین نے گزشتہ ہفتے بھی بنوں شہر میں پولیو مہم میں حصہ لیا تھا۔ پولیس کے مطابق دو حملہ آور ایک موٹر سائیکل پر سوار تھے جو فائرنگ کر کے فرار ہو گئے۔ کینٹ پولیس سٹیشن میں ایف آئی آر درج کر لی گئی جبکہ مقتولہ کے بیٹے کانسٹیبل عارف خان نے کہا ہے کہ ان کے خاندان کی کسی سے دشمنی نہیں ہے۔