لاہور (پ ر) یونیورسٹی آف سرگودھا میں آل پاکستان انٹرورسٹی باسکٹ بال چیمپئن شپ یونیورسٹی آف سنٹرل پنجاب لاہور نے جیت لی۔ چیمپئن شپ میں ملک بھر سے 16 یونیورسٹیوں نے حصہ لیا، چیمپئن شپ کا فائنل یو سی پی اور یونیورسٹی آف سرگودھا کے درمیان کھیلا گیا جوکہ یو سی پی کے کھلاڑیوں نے شاندار کھیل کی بدولت 61 کے مقابلے میں 76 پوائنٹس سے اپنے نام کیا۔ یو سی پی کی طرف سے محمد نوید، عمیر ایوب، وقاص نظر چیتا، عاقب جاوید، محمد رمیض، سلمان بٹ، نصیب رضا، شہریار جاوید، شاہ مقصود، علی اکرام، فیضان محمود اور غلام مجتبیٰ نے شاندار کھیل کا مظاہرہ کیا۔ ایگزیکٹو ڈائریکٹر پنجاب گروپ آف کالجز محمد سہیل افضل اور پروٹیکٹر یو سی پی ڈاکٹر محمد ظفراللہ نے سپورٹس ڈیپارٹمنٹ کو مبارکباد دی اور کھلاڑیوں کو نقد انعام دیا۔