اسلام آباد (آن لائن) نور خان ایئر بیس پر پہنچنے والا خلیجی طیارہ تحقیقات کے بعد واپس روانہ کردیا گیا۔ سول ایوی ایشن ذرائع کے مطابق گذشتہ شب اسلام آباد کے نور خان ایئر بیس پر شیڈول کیخلاف ایک نجی طیارہ آیا تھا جس کے بارے میں تحقیقات کے بعد معلوم ہوا کہ یہ طیارہ ایک معروف بزنس مین ہدایت اللہ کا تھا جوکہ شارجہ میں رجسٹرڈ ہے۔ ذرائع کا کہنا تھا کہ اس طیارے کی ایئرپورٹ پر موجودگی سے ان افواہوں نے بھی جنم لیا کہ غالباً یہ طیارہ پرویز مشرف کو لینے آیا ہے تاہم افواہوں نے اس وقت دم توڑا جب یہ طیارہ ایک بزنس مین کا نکلا۔ ذرائع کا کہنا ہے کہ اس طیارے کے بارے میں مکمل تحقیقات کی گئی ہیں جس کے بعد یہ طیارہ منگل کو اپنے عملے کے ہمراہ واپس روانہ ہوگیا ہے۔