حافظ آباد+ نارنگ منڈی (نمائندہ نوائے وقت+ نامہ نگار) حافظ آباد اور نارنگ منڈی میں ٹریفک حادثات کے دوران 2 خواتین سمیت 9 افراد جاں بحق اور 34 افراد زخمی  ہوگئے۔ تفصیلات کے مطابق پنڈی بھٹیاں سے حافظ آباد آنے والی مسافر ویگن نمبر LWC.2281 قلعہ صاحب سنگھ بائی پاس کے قریب مخالف سمت سے آنیوالے ٹرالے سے ٹکرا گئی۔ جاں بحق ہونے والوں میںمنزہ کوثر، ثنائ، اویس، اشرف، عبد المجید، ڈرائیور صابرحسین شامل ہیں۔ ریسکیو 1122کی امدادی ٹیموں نے زخمیوں کشور، عابدہ، شبیر، ساجد، حاجی عمران، یاسین، نسیم، ابرار، یوسف وغیرہ کو ڈسٹرکٹ ہسپتال منتقل کر دیا جہاں متعدد افراد کی حالت نازک بتائی جاتی ہے۔ حادثہ اتنا شدید تھا کہ ریسکیو اہلکاروں نے ویگن کے حصے کاٹ کر زخمیوں اور جاں بحق ہونے والوں کو باہر نکالاگیا۔ ادھر کالاخطائی روڈ پر جنڈیالہ کلساں کے قریب تیز رفتار ٹیوٹاوین گدھا ریڑھے سے ٹکراگئی جس کے باعث تین افراد جاں بحق اور 14زخمی ہوگئے جبکہ وین مکمل تباہ ہوگئی۔ ویگن شکر گڑھ سے لاہور جا رہی تھی جب نارنگ منڈی کے علاقہ میں پہنچی تو مخالف سمت سے آنے والے گدھا ریڑے سے ٹکرا گئی زخمیوں کو لاہور میوہسپتال ریفر کر دیا گیا ہے جہاں تین زخمی ریاض احمد خوشی محمد اور نامعلوم دم توڑ گئے تاہم تیسر ے مسافر کی شناخت نہیں ہوسکی۔