لاہور(سپورٹس رپورٹر) پاکستان ہاکی فیڈریشن نے پانچویں مرتبہ پاکستان بھارت ہاکی سیریز کے شیڈول کا اعلان کر دیا ہے۔ اس سے قبل چار مرتبہ دونوں ممالک کی ہاکی فیڈریشن کے درمیان سیریز شیڈول پائی تھی لیکن بھارتی حکومت نے اپنی ٹیم کو پاکستان بھجوانے کا این او سی جاری نہیں کیا تھا۔ پاکستان ہاکی فیڈریشن کے صدر اختر رسول نے اس بات کی تصدیق کرتے ہوئے بتایا کہ بھارتی ٹیم 19 جون کو تین میچوں کی سیریز کھیلنے کے لیے پاکستان آئیگی۔ 20 جون کو پاکستان اور بھارت کی ٹیموں کے درمیان پہلا میچ کراچی میں، دوسرا 23 جون کو فیصل آباد جبکہ چوتھا اور آخری میچ 25 جون کو نیشنل ہاکی سٹیڈیم لاہور میں کھیلا جائیگا۔ ان کا کہنا تھا کہ پاکستان ہاکی فیڈریشن کے ایگزیکٹو بورڈ کا اجلاس بلانے کے لیے آج نوٹیفیکشن جاری کر دیا جائیگا جس کے سات روز بعد  اجلاس میں اہم فیصلے کیے جائیں گے۔ ان کا کہنا تھا کہ پاکستان ہاکی فیڈریشن تمام افراد کو ساتھ لیکر چلنا چاہتی ہے۔