اسلام آباد (سٹاف رپورٹر+ نیٹ نیوز+ اے پی پی+ رائٹر) آرمی چیف جنرل راحیل شریف نے حالیہ دنوں میں فوج کے بارے میں بعض عناصر کی جانب سے  بے جا  تنقید پر افسروں اور جوانوں  کی تشویش  کے حوالے سے ردعمل میں کہا ہے کہ موجودہ صورتحال میں جبکہ ملک اندرونی اور بیرونی مشکلات سے دوچار ہے پاک فوج تمام اداروں کو قدر کی نگاہ سے دیکھتی ہے اور یہ اپنے ادارے کے وقار ا ور اداراتی افتخار کا ہر حال میں تحفظ کریگی۔ آئی ایس پی آر کے مطابق چیف آف آرمی سٹاف نے غازی بیس تربیلا میں پاکستان فوج کے سپیشل سروسز گروپ (ایس ایس جی) کے ہیڈ کوارٹر کے دورے دوران کہا کہ پاکستانی فوج نے ہمیشہ قومی سلامتی اور تعمیر و ترقی میں نمایاں کردار ادا کیا ہے۔ وہ یہ اہم فریضہ سرانجام دیتی رہے گی۔  ملک اندرونی اور بیرونی مشکلات سے دوچار ہے۔ پاک فوج تمام اداروں کو قدر کی نگاہ سے دیکھتی ہے۔ انہوں نے سپیشل سروسز گروپ کے افسروں اور جوانوں کی دہشت گردوں کے خلاف کارروائیوں میں ان کی کامیابیوں کو سراہا اور کہا کہ پاک فوج ایس ایس جی کی بہادری اور جنگی مہارت پر فخر کرتی ہے۔ ہماری ایس ایس جی کا شمار دنیا بھر کی بہترین سپیشل فورسز میں ہوتا ہے۔ ایس ایس جی کو انتہائی حساس، پیچیدہ اور دشوار صورتحال میں کام کرنا پڑتا ہے۔ اس کے باوجود ان کی کارکردگی ہمیشہ قابل تحسین رہی ہے۔ ایس ایس جی کے افسروں اور جوانوں سے بات چیت کے دوران چیف آف آرمی سٹاف نے کہا کہ پاک فوج نے مادر وطن کے تحفظ اور سلامتی کے سلسلے میں کسی بھی قسم کی قربانی دینے سے نہ کبھی دریغ کیا اور نہ کرے گی۔ قبل ازیں چیف آف آرمی سٹاف کا تربیلا پہنچنے پر وائس چیف آف جنرل سٹاف میجر جنرل غیور محمود اور جنرل آفیسر کمانڈنگ ایس ایس جی میجر جنرل عابد رفیق نے استقبال کیا۔ جنرل راحیل شریف نے غازی بیس تربیلا میں سپیشل سروسز گروپ کے ہیڈکوارٹر کا دورہ کیا۔ ایس ایس جی کے افسروں اور جوانوں کی قربانیوں کو خراجِ تحسین پیش کیا اور دہشت گردوں کے خلاف کارروائیوں میں ان کی کامیابیوںکو سراہا۔ چیف آف آرمی سٹاف نے کہا کہ ایس ایس جی کو انتہائی حساس، پیچیدہ اور دشوار صورتِحال میں کام کرنا پڑتا ہے، اس کے باوجود ان کی کارکردگی ہمیشہ قابلِ تحسین رہی ہے۔ پاک فوج نے مادرِ وطن کے تحفظ اور سلامتی کے سلسلے میں کسی قربانی دینے سے  کبھی دریغ کیا اور نہ ہی دریغ کرے گی۔ پاک فوج نے قومی حمایت کے ساتھ روایتی ہم آہنگی اور عزم سے ہمیشہ قومی سلامتی اور تعمیر وترقی میں نمایاں کردار ادا کیا ہے اور یہ اہم فریضہ سرانجام دیتی رہے گی۔