لاہور (نامہ نگار) لاہور میں آتشزدگی کے چار مختلف واقعات میں لاکھوں روپے مالیت کا سامان جل کر تباہ جبکہ دو افراد جھلس کر زخمی ہو گئے۔ امدادی ٹیموں نے موقع پر پہنچ کر آگ پر قابو پالیا اور دونوں جھلسنے والوں کو طبی امداد کے لئے ہسپتال داخل کرا دیا ہے۔ سمن آباد کے علاقہ شباب کالونی میں واقع خالد پان شاپ میںشارٹ سرکٹ کے باعث آگ بھڑک اٹھی جس سے دو لاکھ روپے مالیت کا سامان جل کر تباہ ہوگیا جبکہ دکان مالک 35 سالہ زین آگ کی زد میں آکر جھلس کر زخمی ہو گیا۔ اطلاع ملنے پر ریسکیو 1122کے عملہ نے موقع پر پہنچ کر آگ پر قابو پا لیا۔ نشتر کالونی کے علاقہ میںصفدر کے گھر میں شارٹ سرکٹ کے باعث آگ بھڑک اٹھی جس سے لاکھوں روپے مالیت کا سامان جل کر تباہ ہو گیا جبکہ آگ پر قابو پانے کی کوشش میں صفدرجھلس کر زخمی ہو گیا۔ نشتر کالونی کے علاقہ میں ہی گجومتہ سٹا کے قریب ایک فیکٹری میں آگ لگنے سے لاکھوں روپے کا سامان جل کر تباہ ہو گیا۔ علاقہ میں شدید خوف وہراس پھیل گیا۔بند روڈ پر فیکٹری کی دو منزلہ عمارت میں شارٹ سرکٹ کے باعث آگ بھڑک اٹھی ۔فیکٹری میں موجود ملازمین نے بھاگ کر اپنی جانیں بچائیں۔ اطلاع ملنے پر ریسکیو1122اور دیگر امدادی ٹیموں نے موقع پر پہنچ کر آگ پر قابو پا لیا ہے۔