لاہور (این این آئی + نامہ نگاران) لاہور سمیت بالائی پنجاب اور خیبر پی کے کئی شہروں میں چند مقامات پر ہلکی بارش سے موسم خوشگوار ہوگیا۔ محکمہ موسمیات کے مطابق لاہور، گوجرانوالہ، راولپنڈی اسلام آباد سمیت پنجاب کے بالائی علاقوں میں ہلکی بارش ہوئی، بالائی خیبر پی کے، کشمیر اور گلگت بلتستان میں بھی چند مقامات پر بارش سے گرمی کا زور کم ہو گیا۔ محکمہ موسمیات کے مطابق آئندہ چوبیس گھنٹوں کے دوران ملک کے بالائی علاقوں میں چند مقامات پر تیز ہوائوں اور گرج چمک کے ساتھ بارش ہوسکتی ہے۔ میانوالی سے نامہ نگار کے مطابق نواحی علاقہ کچھ تندرخیل میں مکان کی چھت گرنے سے میاں بیوی، پوتے اور پوتی سمیت زخمی ہوگئے۔ 60 سالہ سہراب دین، اس کی بیوی سرور جاناں، پوتی عید مرجاناں اور 8 سالہ پوتا دانیال اپنے کمرے میں موجود تھے کہ تیز بارش اور ژالہ باری سے ان کے کچے مکان کی چھت اوپر آن گری جس کی وجہ سے وہ زخمی ہوگئے جبکہ دو بکریاں ہلاک ہوگئیں۔ سرگودھا سے نامہ نگار کے مطابق سرگودھا اور گردونواح میں گزشتہ روز ہونے والی بارش سے موسم خوشگوار ہوگیا۔ بارش کے باعث موسم میں خوشگوار تبدیلی سے لوگوں کی بڑی تعداد تفریحی مقامات پر پکنک مناتے رہے۔