لاہور (سٹاف رپورٹر +نامہ نگار) لاہور کے علاقے ہربنس پورہ میں موٹر سائیکل کے کھمبے سے ٹکرانے پر باپ بیٹا موقع پر ہی دم توڑ گئے جبکہ اہلیہ، بیٹی اور بیٹے کو شدید زخمی حالت میں ہسپتال منتقل کردیا گیا۔ معلوم ہوا ہے کہ ہربنس پورہ کے علاقہ عزیز پلی کے قریب ساہیوال کا رہائشی 43 سالہ عابد رسول اپنے 6 سالہ بیٹے اویس، اہلیہ زینت، بیٹی اور چھوٹے بیٹے کے ہمراہ باٹاپور کی طرف جارہا تھا کہ اچانک موٹر سائیکل فٹ پاتھ کے اوپر لگے کھمبے سے ٹکرا گئی۔ عابد کی اہلیہ، بیٹی اور بیٹے کو شدید زخمی حالت میں طبی امداد کے لئے قریبی ہسپتال منتقل کردیا گیا۔ پولیس نے ضروری کارروائی کے بعد نعشوں کو ورثاء کے حوالے کردیا۔ ہسپتال میں زخمی ہونے والے دونوں بچوں کی حالت خطرے سے باہر بتائی گئی جبکہ زینت کی حالت تشویشناک تھی۔