ٹنڈو آدم سے جام نواز علی تک20 کلو میٹر سڑک غائب‘کئی کئی فٹ گڑھے پڑگئے
کراچی (سالک مجید) سابق صدر مملکت آصف علی زرداری کے احکامات نظرانداز‘ سندھ میں سڑکوں کی تباہ حالی پر حکومت سندھ کوئی توجہ نہیں دے سکی۔ صوبے بھر کی شاہراہیں ٹوٹ پھوٹ کا شکار ہیں روزانہ لاکھوں مسافروں کو سخت پریشان اور مشکلات کا سامنا کرنا پڑتا ہے جبکہ سڑکوں میں بڑے بڑے گڑھے پڑنے اور کئی کئی کلومیٹر تک سڑکیں ٹوٹ پھوٹ کا شکار ہونے کی وجہ سے گاڑیوں کو بھی نقصان پہنچ رہا ہے۔ محکمہ ورکس اینڈ سروسز کی بے حسی اور نااہلی کے سبب عوام کو سخت تکلیف برداشت کرنی پڑ رہی ہے۔ مسافروں کے مطابق ٹنڈو آدم بائی پاس سے جام نواز علی تک تقریباً 20 کلومیٹر کی سڑک چار پانچ سال سے ٹوٹ پھوٹ چکی ہے۔
