اسلام آباد (آئی این پی) شادی کے بعد امریکہ منتقلی کے باعث پردہ سکرین سے غائب معروف اداکارہ ریما پاک چائنہ فرینڈشپ سنٹر میں منعقدہ نیشنل بک ڈے کی تقریب میں حاضرین کی توجہ کا مرکز بنی رہیں۔ ریما نے کتاب سے دوستی کا ثبوت دیتے ہوئے ہر سٹال کا دورہ کرکے کتابیں خریدنے والے اپنے مداحوں کو ان پر آٹوگراف دئیے۔ تفصیلات کے مطابق منگل کو پاک چائنہ فرینڈشپ سنٹر میں ’’نیشنل بک ڈے‘‘ کی تقریب میں چند روز قبل امریکہ سے واپس آنے والی اداکارہ ریما نے بھی شرکت کی۔ ریما نے تقریب میں لگائے گئے مختلف بک سٹالوں کا دورہ کرکے نہ صرف اپنے مداحوں کے ساتھ تصاویر بنوائیں بلکہ انہیں کتابوں پر آٹوگراف بھی دئیے۔ اس موقع پر میڈیا سے گفتگو کرتے ہوئے اداکارہ ریما نے کہا کہ کتابیں بہترین دوست ہوتی ہیں جو قدم قدم پر آپ کی کامیابی کا سبب بنتی ہیں۔