ملبورن(آئی این پی) آسٹریلوی کرکٹ ٹیم کے قائد مائیکل کلارک نے کہا ہے کہ رواں برس اکتوبر میں متحدہ عرب امارات میں پاکستان کے خلاف سیریز کانٹے دار ہوگی تاہم اس چیلنج سے نمٹنے کیلئے ہم پوری طرح تیار ہیں۔پاکستان کی مضبوط ٹیم ہے اور ماضی میں یو اے ای میں کئی فتوحات حاصل کرچکی ہے، گرین شرٹس کے کھلاڑی عرب امارات  کنڈیشنز سے اچھی طرح واقف ہیں اس لئے اسے زیر کرنے کیلئے ٹیم کے ہر کھلاڑی کو اپنی ذمہ داری احسن طریقے سے نبھانا ہوگی۔ پاکستان کے پاس اچھے فاسٹ بولرز، اسپنرز اور تجربہ کار بلے باز ہیں اس لئے میں سمجھتا ہوں کہ ہماری ٹیم کیلئے یہ سیریز چیلنجنگ ہوگی تاہم ہم بھرپور مقابلے کیلئے تیار ہیں۔ پاکستان کو شکست دینا آسان نہیں ہوگا کھلاڑیوں کو محنت کرنا ہوگی۔