خیرپور / سبی (نوائے وقت رپورٹ+ اے پی پی) خیرپور میں گمبٹ ریلوے سٹیشن کے قریب ٹریک پر دھماکہ ہوا۔ پولیس کے مطابق دھماکے سے دو فٹ ریلوے کی پٹڑی کو نقصان پہنچا۔ ٹریک پر دھماکے کے بعد ٹرینوں کی آمدورفت معطل ہوگئی۔ اندرون ملک جانے اور آنیوالی ٹرینوں کو مختلف سٹیشنز پر روکدیا گیا۔علاوہ ازیں اے پی پی کے مطابق سبی  میں بھی ریلوے ٹریک پر دھماکے کے نتیجہ میں ٹرینوں کی آمدورفت عارضی طور پر معطل ہوگئی۔ نواحی علاقے ڈنگڑا میں نامعلوم شدت پسندوں نے ریلوے ٹریک کو دھماکہ خیز مواد سے اڑا دیا جس کے باعث ٹریک کو جزوی نقصان پہنچا ۔ریلوے حکام کے مطابق ٹریک کی بحالی کیلئے امدادی ٹیم جائے وقوعہ کی جانب روانہ کردی گئی ہے۔ دھماکہ کے نتیجہ میں کسی جانی نقصان کی اطلاع موصول نہیں ہوئی۔