اسلام آباد( اے پی پی ) وزیر اعظم یوتھ پروگرام کی چیئر پرسن مریم نواز شریف نے سی بی اے یونین کے ریفرنڈم میں کامیابی پر پی آئی اے ایئر لیگ کو مبارکباد دی ۔ انہوں نے ریفرنڈم میں کامیابی پر ایئر لیگ کے نو منتخب ارکان کو مبارکباد پیش کرتے ہوئے امید ظاہر کی کہ ایئر لیگ پی آئی اے کو منافع بخش ادارہ بنانے کیلئے موجودہ حکومت کی کوششوں کو بڑھائے گی ۔ پی آئی اے ایئر لیگ کو نو منتخب چیئرمین شاہد قریشی صدر شمیم اکمل اور جنرل سیکرٹری ناصر جنجوعہ کے نام پیغام میں مریم نواز شریف نے زور دیا کہ وہ ملازمین کے جائز حقوق اور ادارے کی کارکردگی کو بڑھانے کیلئے لگن کے ساتھ کام کریں ۔