ہیگ (اے پی پی)  ایف آئی ایچ ہاکی ورلڈ کپ، دفاعی چیمپئن آسٹریلیا نے اپنے آخری گروپ میچ میں بھارت کو 4-0 سے شرمناک شکست دے کر بآسانی سیمی فائنل میں جگہ بنا لی، آسٹریلوی ٹیم نے گروپ اے میں ناقابل شکست رہنے کا اعزاز حاصل کیا اور پانچوں میچ جیت کر 15 پوائنٹس حاصل کئے۔ ویمن میں آسٹریلیا اور نیوزی لینڈ کے درمیان میچ برابر رہا۔ تفصیلات کے مطابق گزشتہ روز مینز ایونٹ میں گروپ اے کے میچ میں دفاعی چیمپئن آسٹریلیا نے بھارت کو آئوٹ کلاس کر دیا اور اپنے آخری گروپ میچ میں 4-0 سے فتح حاصل کرکے بآسانی سیمی فائنل کیلئے کوالیفائی کر لیا۔ فاتح ٹیم کی جانب سے کرس کریلیو نے شاندار کھیل پیش کیا اور دو گول سکور کئے۔ کیرن گاورز اور جیرمی ہاورڈ نے ایک ایک گول سکور کیا۔ بھارتی ٹیم نے ایونٹ میں ملائیشیا کے خلاف فتح حاصل کی جبکہ تین میچوں میں اسے شکست کا سامنا کرنا پڑا۔ خواتین ایونٹ میں آسٹریلیا اور نیوزی لینڈ کے درمیان میچ برابر رہا۔