اسلام آباد ایئرپورٹ پر روسی خاتون کے سامان سے پستول کی گولیاں برآمد
اسلام آباد (آئی این پی) بے نظیر انٹر نیشنل ایئرپورٹ پر روسی خاتون کے سامان سے پستول کی گولیاں برآمد کرلی گئیں ، ایئرپورٹ حکام نے گولیاں ضبط کرکے انہیں سفر کی اجازت دے دی۔ منگل کو نجی ایئرلائن کی پرواز سے اسلام آباد سے ابو ظہبی جانے والی روسی شہریت کی حامل خاتون کے سامان کی تلاشی کے دوران پستول کی گولیاں برآمد ہوئیں۔ ایئرپورٹ سکیورٹی فورس کے اہلکاروں اور ایئرپورٹ حکام نے تفتیش کے بعد گولیاں ضبط کرکے خاتون کو سفر کی اجازت دے دی۔واضح رہے کہ گزشتہ ماہ کراچی ایئرپورٹ سے بھی ایک امریکی شہری کے سامان سے اسلحہ برآمد ہوا تھا تاہم بعد میں وہ ایف بی آئی ایجنٹ نکلا تھا۔
