کراچی (سپورٹس رپورٹر) سابق ایشیا نمبر ٹو کیوسٹ اور سابق نیشنل چیمپئن محمد سجاد آئی بی ایس ایف سکس ریڈسنوکر چیمپئن شپ کے کوارٹر فائنل میں پہنچ گئے جبکہ ٹیم چیمپئن شپ کے لاسٹ 16رائونڈ میں محمد آصف اور محمد سجاد پر مشتمل قومی سنوکر ٹیم مصر سے مقابلہ کرے گی ۔مصر کے شہر شرم الشیخ میں جاری ایونٹ میں پاکستان کے ٹاپ کیوسٹ محمد سجاد نے  لاسٹ32کے رائونڈ میں بھارت کے لکشمن راونت کو4-0سے زیرکیا ۔محمد سجاد نے تیسرے فریم میں60کا بریک بھی کھیلا ۔شام کے سیشن میں انہوں نے پری کوارٹر فائنل میں افغانستان کے محمد رئیس شینزئی کو4-1سے مات دے کر ٹاپ ایٹ کی فہرست میں جگہ بنالی۔ ٹیم ایونٹ کے لاسٹ 32رائونڈ میں گرین شرٹس نے آسٹریلیا کو3-1سے زیر کیا۔