گوجرانوالہ (نمائندہ خصو صی) گوجرانوالہ میں گھریلو حالات سے دلبرداشتہ خاتون تین بچوں سمیت نہر میں کود گئی، ریسکیو اہلکاروں نے خاتون اور دو بچوں کو نہر سے نکال لیا جبکہ لا پتہ ہو نیوالے تیسرے بچے کی تلاش کیلئے جاری آپریشن اندھیرے کی وجہ سے روک دیا گیا۔ فیروزوالا پل کی رہائشی تیس سالہ ریحانہ بی بی زوجہ عامر نے گزشتہ روز گھریلوحالات، پریشانیوں اور آئے روز جھگڑوں سے دلبرداشتہ ہوکر 9 سالہ بیٹی اقرا، 6 سالہ ذیشان، 7 سالہ فیضان کے ہمراہ نہر اپر چناب میںچھلا نگ لگا دی۔ واقعہ کی اطلاع ملنے پر ریسکیو اہلکار موقع پر پہنچ گئے جبکہ اس دوران موقع پر موجود افراد اور امداد ی ٹیموں کے مشترکہ آپریشن کے دوران خاتون، اقرا 6 سالہ ذ یشان کو نہر سے نکال لیا جنہیں فوری طبی امداد کیلئے ہسپتال منتقل کردیا گیا جبکہ لاپتہ ہونے والے تیسرے بچے فیضان کی تلاش کیلئے ریسکیو آپریشن کئی گھنٹے جاری رہنے کے بعد اندھیرے کے باعث روک دیا گیا۔