کہوٹہ + میرپور + لاہور (آئی این پی + این این آئی) کہوٹہ میں زہریلی شراب پینے سے ہلاک ہونے والوں کی تعداد 8 ہو گئی ہے جبکہ میرپور آزاد کشمیر میں بھی زہریلی  شراب پینے کے واقعہ میں 6 افراد دم توڑ گئے۔ پولیس کے مطابق  کہوٹہ میں  زہریلی شراب پینے سے مرنے والوں میں 2 کا تعلق کلر سیداں جبکہ 6 کا تعلق کہوٹہ ہی کے علاقے نارہ مٹور سے ہے۔ دوسری جانب میرپور آزاد کشمیر میں بھی زہریلی شراب پینے سے ہلاکتوں کا واقعہ پیش آیا جہاں  6 افراد ہلاک ہو گئے۔ مرنے والوں میں دلدار، عابد، فاروق، خالد اور کالان شامل ہیں۔ علاوہ ازیں وزیراعلیٰ پنجاب محمد شہباز شریف نے کہوٹہ میں زہریلی شراب پینے سے 8 افراد کی ہلاکت کی خبر کا نوٹس لیتے ہوئے انتظامیہ اور پولیس حکام سے رپورٹ طلب کر لی اور واقعہ کی انکوائری کا حکم دیا ہے۔