لندن (سپورٹس ڈیسک) رافیل نڈال کو اپ سیٹ شکست کا سامنا ۔جرمنی کی انجلیق کربر نے روسی سٹار ماریہ شراپووا کو شکست دے کر ومبلڈن اوپن ٹینس ٹورنامنٹ سے باہر کر دیا۔ جرمن سٹا انجلیق کربر کا سکور سات چار، چار چھ اور چھ چار رہا۔ پاکستانی سٹار اعصام الحق قریشی اور بھارتی روہن بھوپنا کی جوڑی مینز ڈبلز میں شکست کھا گئی۔ پاکستان بھارت جوڑی نے مقابلہ خوب کیا مگر شکست سے نہ بچ سکی ۔پاکستا ن بھارت جوڑی کو پوسپیل اور جے سوک کی جوڑی نے تین سات، سات پانچ، چھ تین، چار چھ اور سات پانچ سے ہرایا۔ سپین کے رافیل نڈال اپ سیٹ شکست کے بعد ٹورنامنٹ سے باہر ہو گئے۔ عالمی نمبر ایک کو رینکنگ میں 144ویں نمبر کے آسٹریلوی نک کرگیئس نے شکست سے دوچار کیا۔ ان کی کامیابی کا سکور سات پانچ، پانچ سات، سات پانچ اور چھ دو رہا۔ نک کرگیئس کوارٹرفائنل میں پہنچ گئے۔ راجر فیڈرر نے ٹوم رابرڈو کو شکست دے کر کوارٹرفائنل میں جگہ بنا لی۔ سٹانیلاس واورنیکا نے لوپیز کو ہرا کر کوارٹرفائنل کیلئے کوالیفائی کر لیا۔ نووک ڈجکووک، اینڈی مرے پہلے ہی اس مرحلہ میں پہنچ چکے ہیں۔ ویمنز سنگلز میں سیمونہ ہلیپ، سیسکی اور میکاروو بھی کوارٹرفائنل میں پہنچ گئیں۔ مینز ڈبلز میں امریکی برائن برادرز بوب برائن اور مائیک برائن نے اگلے تیسرے راؤنڈ میں جگہ بنا لی۔