کراچی میں فائرنگ، پولیس اہلکار سمیت 4افراد قتل، رینجر سے مقابلہ، نوجوان مارا گیا
کراچی (کرائم رپورٹر+ نوائے وقت رپورٹ+ ایجنسیاں ) شاہ لطیف ٹائون کراچی میں فائرنگ سے زخمی سب انسپکٹر چل بسا۔ فائرنگ سے 2 پولیس اہلکار زخمی ہوئے تھے۔ انسپکٹر رشید سرکی بن قاسم تھانے میں تعینات تھا۔ شرافی گوٹھ میں فائرنگ سے ایک شخص جاں بحق ہو گیا۔ علاوہ ازیں اورنگی ٹائون ساڑھے گیارہ میں فائرنگ سے ایک شخص زخمی ہو گیا جسے ہسپتال منتقل کیا جا رہا تھا کہ وہ راستے میں دم توڑ گیا۔ نیو کراچی دو منٹ چورنگی کے قریب فائرنگ کے ایک اور واقعے میں ایک شخص زخمی ہو گیا۔ ریسکیو ذرائع کے مطابق زخمی شخص کو ہسپتال منتقل کر دیا گیا جہاں وہ دوران علاج چل بسا۔ پالے خان نیو کراچی پولیس نے ایک ٹارگٹ کلر کو گرفتار کر کے اسلحہ برآمد کر لیا جبکہ بلوچ کالونی سے بھی سیاسی کارکن کے قتل میں ملوث ملزم پکڑا گیا۔ سٹی ریلوے سٹیشن کے قریب رینجرز کے ساتھ مبینہ مقابلے میں ایک نوجوان مارا گیا جس کے قبضے سے رینجرز نے اسلحہ برآمد ہونے کا دعویٰ کیا ہے جبکہ دوسری طرف مارے جانے والے نوجوان سہیل درانی کے بھائی عدنان درانی نے رینجرز پر جعلی مقابلہ کرنے کا الزام عائد کیا ہے۔ رینجرز کے مطابق ملزم سہیل درانی بھتہ خوری اور دیگر سنگین جرائم میں ملوث تھا۔ منگھو پیر ماربل فیکٹری کے قریب سے 10 کلو وزنی بم برآمد کیا گیا جسے بم ڈسپوزل سکواڈ نے ناکارہ بنا دیا۔ علاوہ ازیں رینجرز نے کراچی کے مختلف علاقوں میں چھاپے گینگ وار کے تین کارندوں سمیت پانچ ملزمان کو گرفتار کر کے اسلحہ اور مسروقہ موٹرسائیکل برآمد کر لی۔
کراچی 4 قتل
