ریوڈی جنیرو (سپورٹس ڈیسک) ارجنٹائن فٹبال ٹیم کے کوچ الجینڈرو سبیلا نے ان خبروں کو مسترد کر دیا ہے کہ ان کی ٹیم ورلڈکپ میں صرف لیونل میسی پر انحصار کر رہی ہے۔ انہوں نے کہا کہ لیونل میسی نے ساتھی کھلاڑیوں کی مدد ضرور کی ہے تاکہ کارکردگی میں اضافہ ہو۔ کسی بھی ٹیم میں اگر لیونل میسی جیسا کھلاڑی ہو تو وہ ضرور اس پر انحصار کرے گی۔ میرے خیال میں وہ اپنے لئے نہیں ٹیم کیلئے کھیلتا ہے۔ وہ دنیا کا بہترین کھلاڑی ہے اور ہماری ٹیم کا حصہ ہے۔ چار سال قبل ان پر تنقید کی جاتی تھی مگر آج مکمل طور پر میسی پر انحصار کیا جاتا ہے، یہ کوئی آسان کام نہیں۔ دریں اثناء ارجنٹائن کے شائقین نے بھی قومی ٹیم کی حوصلہ افزائی کی ہے۔ شائقین کا کہنا تھا کہ ان کی ٹیم کے حوصلے بلند ہیں اور بیلجیئم کو شکست دے گی اور ورلڈکپ جیت کر جائے گی۔