فیصل آباد + ٹوبہ ٹیک سنگھ + چکوال (نمائندہ خصوصی+ نامہ نگاران) غربت، بیروزگاری، گھریلو جھگڑوں سے دلبرداشتہ دو خواتین سمیت چار افراد نے زہریلی گولیاں نگل کر زندگی کا خاتمہ کر لیا۔ چک 68ر۔ب کی 17سالہ (ص) اور پنڈی بھٹیاں کے علاقے بیگم کوٹ کی 30 سالہ (ش) نے گھریلو جھگڑوں سے دلبرداشتہ ہو کر زہریلی گولیاں نگل کر زندگی کا خاتمہ کر لیا۔ شاداب کالونی کے 35 سالہ کاشف اور چک 179ر۔ب کے 30 سالہ افتخار نے غربت اور بے روزگاری سے تنگ آ کر گندم میں رکھنے والی زہریلی گولیاں نگل کر موت کو گلے لگا لیا۔ ہسپتال انتظامیہ نے ضروری کارروائی کے بعد نعش ورثا کے حوالے کر دی ہیں۔ علاوہ ازیں ٹوبہ ٹیک سنگھ میں نامعلوم وجوہات کی بناء پر ایک شخص نے خود کشی کر لی۔ چک 261گ ب میں طارق نے نامعلوم وجوہ کی بناء پر سر میں گولی مار کر اپنی زندگی کا خاتمہ کر لیا، پولیس مصروف تفتیش ہے۔ چکوال میں خاتون سمیت دو افراد نے خودکشی کر لی۔ تھانہ ڈھڈیال کی حدود لوہیسر میں 22 سالہ شادی شدہ خاتون فاخرہ بی بی نے شوہر کیساتھ جھگڑوں سے تنگ آکر زہریلی گولیاں پھانک لیں۔ دوسرے واقعہ میں راولپنڈی روڈ پر محلہ امین آباد میں مرسلین عرف بوبی نے بیوی سے جھگڑے کے بعد زہریلی گولیاں پھانک لیں جس سے وہ زندگی کی بازی ہار گیا۔