گال (سپورٹس ڈیسک)جنوبی افریقہ نے سری لنکا کو گال میںکھیلے گئے سیریز کے پہلے ٹیسٹ میں 153رنز سے شکست دے کر دو میچوں کی سیریز میںایک صفر کی برتری حاصل کر لی۔ جنوبی افریقہ کی ٹیم نے پہلی اننگز میں9 وکٹوں پر 455رنز سکور کئے اور اننگز ڈکلیئر کر دی۔سری لنکا کی ٹیم پہلی اننگز میں 292 رنز پر ڈھیر ہوگئی۔جنوبی افریقہ نے دوسری اننگز 206 رنز پر ڈکلیئر کر دی۔۔ سری لنکا کو جیت کیلئے دوسری اننگز میں 370 رنز کا ہدف ملا لیکن اس کا کوئی بھی کھلاڑٰی قابل ذکر کارکردگی نہ دکھا سکا اور پوری ٹیم 216پر واپس پویلین لوٹ گئی۔سنگا کارا 76 ‘جے کے سلوا  38 ‘ہیراتھ 20 اینجلو میتھیوز 27ناٹ آئوٹ بنانے میں کامیاب ہوئے۔ ڈیل سٹین ایک بار پھر بلے بازوں کیلئے قیامت بن کر ٹوٹ پڑے اور 4 کھلاڑیوں کا شکار کر لیا۔ مورنی مورکل نے بھی 4کھلاڑیوں کو پویلین کا راستہ دکھایا۔ ڈومنی نے دو وکٹیں اپنے نام کیں۔ڈیل سٹین کو میچ میں 9 وکٹیں لینے پر مین آف دی میچ کا ایوارڈ دیا گیا۔ دونوں ٹیموں کے درمیان سیریز کا دوسرا ٹیسٹ میچ چوبیس جولائی سے شروع ہوگا۔