ساہیوال+ پشاور+ کراچی (نوائے وقت رپورٹ+ ایجنسیاں) ساہیوال میں ری فلنگ کرتے ہوئے ایل پی جی سلنڈر پھٹنے سے نوجوان جبکہ پشاور اور کراچی میں سی این جی گاڑیوں میں بھرواتے ہوئے سلنڈر پھٹنے سے 7 افراد جاں بحق 13 افراد شدید زخمی ہو گئے۔ تفصیلات کے مطابق ساہیوال میں گیس کی دکان میں ایل پی جی کی ری فلنگ کرتے ہوئے سلنڈر پھٹنے سے دکان کا مالک نعیم اور وہاں موجود 6 فراد زخمی ہو گئے۔ نعیم کو تشویشناک حالت میں لاہور منتقل کیا گیا جہاں وہ دم توڑ گیا۔ دریں اثناء پشاور کے علاقے رنگ روڈ کے ایک سی این جی پمپ پر گاڑی میں گیس بھرواتے ہوئے سی این جی سلنڈر پھٹنے سے 4 افراد جاں بحق دو شدید زخمی ہو گئے۔ مرنیوالوں میں سیلز مین اور پمپ مینجر شامل ہیں۔ دھماکے سے گاڑی کے پرخچے اڑ گئے اور سی این جی پمپ کی چھت اڑ گئی علاوہ ازیں کراچی کے علاقے فیڈرل بی ایریا میں راشد منہاس روڈ کے ایک سی این جی پمپ پر بس میں گیس بھرواتے ہوئے سلنڈر دھماکے سے پھٹ گیا جس سے علاقہ لرز اٹھا اس واقعہ میں 3 افراد جاں بحق 5 شدید زخمی ہو گئے جنہیں فوری طور پر ہسپتال منتقل کر دیا گیا۔ دھماکے سے بس بھی جزوی طور پر تباہ ہو گئی اردگرد کھڑی گاڑیوں اور پمپ کو بھی نقصان پہنچا۔ پولیس کے مطابق سلنڈر پرانا ہونے کی وجہ سے پھٹا۔