راولپنڈی (اے پی اے) پاک فوج نے شمالی وزیرستان سے نقل مکانی کرنیوالے افراد کیلئے خصوصی عید پیکج بجھوا دیا۔ عید پیکیج 220 ٹن خشک راشن پر مشتمل ہے۔ آئی ایس پی آر کے مطابق ریس کورس گراؤنڈ راولپنڈی سے شمالی وزیرستان کے آئی ڈی پیز کیلئے 22 ٹرکوں میں 220 ٹن راشن بھیجا گیا ہے۔ خشک راشن میں آٹا، چاول، چینی،کوکنگ آئل، خشک دودھ، چائے اور دیگر اشیائے خورد و نوش شامل ہیں۔ یہ راشن راولپنڈی اور اسلام آباد کے شہریوں نے پاک فوج کی طرف سے قائم کئے گئے کیمپس پر رضاکارانہ طور پر جمع کرایا تھا۔ اب تک راولپنڈی کور کی طرف سے مجموعی طور پر آئی ڈی پیز کیلئے 440 ٹن راشن بھجوایا جا چکا ہے۔