گوجرانوالہ (نمائندہ خصوصی) گوجرانوالہ میں مختلف واقعات میں دھاتی ڈور پھرنے سے موٹرسائیکل سوار باپ بیٹا سمیت 3 افراد زخمی ہوگئے۔ پولیس تھانہ صدر صدر ڈسکہ کے علاقہ گلوٹیاں کے قریب ڈور پھرنے سے موٹرسائیکل سوار 30 سالہ قاسم اور اسکا 4 سالہ بیٹا واصف زخمی ہو گئے جنہیں ڈسٹرکٹ ہیڈکوارٹر ہسپتال منتقل کر دیا گیا ہے۔ دوسری طرف لوہیانوالی کا 17 سالہ علی احتشام موٹرسائیکل پر اروپ جا رہا تھا ایجوکیشن بورڈ آفس کے قریب دھاتی ڈور گلے میں پھرنے سے شدید زخمی ہو گیا۔ اطلاع ملنے پر ریسکیو اہلکار موقع پر پہنچ گئے جنہوں نے علی احتشام کو فوری طبی امدا د کیلئے ڈسٹرکٹ ہیڈ ہسپتال منتقل کردیا ہے جہاں ڈاکٹرز اس کو طبی امداد فراہم کر رہے ہیں۔ دوسری طرف اروپ پولیس نے بھی موقع پر پہنچ کر واقعہ کی تحقیقات شروع کر دی۔ لاہور سے خصوصی رپورٹر کے مطابق وزیراعلی پنجاب محمد شہبازشریف نے گوجرانوالہ میں ڈور پھرنے سے باپ اور بیٹے کے زخمی ہونے کا واقعہ کا نوٹس لیتے ہوئے آرپی او گوجرانوالہ سے رپورٹ طلب کرلی ہے۔ وزیراعلی نے ہسپتال انتظامیہ کو ہدایت کی ہے زخمی باپ بیٹے کو علاج و معالجے کی بہترین سہولتیں فراہم کی جائیں۔