4 خودکشیاں: فیروزوالا میں گھریلو حالات سے دلبرداشتہ 2 نوجوانوں نے زندگی ختم کرلی
فیروزوالا+ سیالکوٹ+ اوکاڑہ (نامہ نگاران) مختلف وجوہات پر 4 افراد نے زندگی کا خاتمہ کر لیا۔ تفصیلات کے مطابق فیروزوالا میں گھریلو حالات سے دلبرداشتہ ہوکر دو نوجوانوں نے زہریلی گولیاں کھاکر خودکشی کرلی۔ کالاخطائی روڈ کی آبادی میں نوجوان سونا رفیق نے گھریلو حالات میں دلبرداشتہ ہوکر زہریلی گولیاں کھا لیں جس کی حالت غیر ہونے پر ہسپتال لایا جا رہا تھا راستے میں دم توڑ گیا۔ حدوکی میں جاوید احمد نے زہریلی گولیاں کھاکر اپنی زندگی کا خاتمہ کر لیا۔ پولیس مریدکے نے واقعہ کی رپورٹ درج کر لی۔ متوفی کی نعش ضروری کارروائی کے بعد ورثاء کے حوالے کر دی۔ علاوہ ازیں سیالکوٹ، اوکاڑہ میں 2 نوجوانوں نے زندگی کا خاتمہ کر لیا۔ تھانہ اگوکی کے علاقہ دربار ملک شاہ ولی کے قریب سالہ نوجوان نے پھندا سے لٹک کرزندگی کا خاتمہ کرلیا۔ پولیس کے مطابق متوفی انیس سالہ علی رضا لاہور کا رہائشی تھا۔ اوکاڑہ میں بصیرپور کے نوجوان نے گھریلو جھگڑے پر دلبرداشتہ ہو کرزہریلی گولیاں نگل لیں حالت تشویشناک ہونے پر ڈی ایچ کیو ہسپتال منتقل کیا گیا جہاں دم توڑ گیا۔
