لاہور(سپورٹس رپورٹر) پنجاب کبڈی ایسوسی ایشن کے زیر اہتمام آئی ڈی پیز کی امداد کے لیے کھیلا جانے والا نمائشی کبڈی میچ پاکستان گرینز کی ٹیم نے جیت لیا۔ پاکستان گرینز ٹیم نے سخت مقابلے کے بعد پاکستان وائٹس ٹیم کو 37-32 سکور سے شکست دی۔ اس موقع پر کبڈی کے شائقین کی بڑی تعداد سمیت سابق نامور کبڈی کے کھلاڑی بھی موجود تھے۔ دونوں ٹیموں میں پاکستان کے انٹرنیشنل کھلاڑی جنہوں نے بین الاقوامی سطح پر ملک کی نمائندگی کر رکھی نے شرکت کی ان میں سجاد گجر، نعیم بٹ، مشرف جاوید جنجوعہ، شمس، ضیاء رانجھا، خالد بھٹی اور شفیق بٹ شامل تھے۔ دونوں ٹیموں کے درمیان کھیلے جانے والے میچ کے وقفہ تک پاکستان گرینز ٹیم کے 17 جبکہ پاکستان وائٹس ٹیم کے 12 پوائنٹس تھے۔ میچ سے قبل شاہدرہ اور شیخوپورہ کی ٹیموں کے درمیان میچ کے علاوہ جمناسٹک کا مظاہرہ بھی کیا گیا۔ نمائشی میچ کے مہمان خصوصی رکن قومی اسمبلی ملک ریاض، پاکستان کبڈی فیڈریشن کے سیکرٹری رانا محمد سرور، اختر عباس خواجہ، آرگنائزنگ سیکرٹری پروفیسر ظفر گجر نے میچ کے اختتام پر کھلاڑیوں میں انعامات تقسیم کیے۔