سنکیانگ (نوائے وقت رپورٹ+اے ایف پی)چین کے مسلمان اکثریت والے علاقے سنکیانگ میں پولیس نے 9 مبینہ دہشت گردوں کو ہلاک اور ایک کو گرفتار کرلیاہے۔پولیس کے مطابق سنکیانگ کے علاقے ہوٹان میں لوگوں نے مشتبہ افراد کی نشاندہی کی۔ مقامی لوگوں کی مدد سے پولیس نے انہیں ایک مکان میں گھیر لیا۔ اس موقع پر فائرنگ کے تبادلے میں نو مبینہ دہشت گرد مارے گئے جبکہ ایک کو گرفتار کرلیا گیا۔ واقعے میں کو ئی شہری یا پولیس اہلکار زخمی نہیں ہوا۔چین کے سرکاری میڈیا نے کہا ہے کہ گزشتہ ہفتے مغربی صوبے سنکیانگ میں 37شہری اور 59حملہ آور مارے گئے تھے ۔ چین کی سرکاری نیوز ایجنسی کے مطابق گزشتہ ہفتے تیرہ افراد زخمی ہوئے تھے جبکہ  215حملہ آوروں کو گرفتار کر لیا گیا تھا۔