لاہور (خصوصی رپورٹر) پیپلز پارٹی پنجاب کے صدر میاں منظور احمد وٹو نے ڈاکٹر طاہر القادری کی گرفتاری کے حکومتی فیصلے کو رد کرتے ہوئے کہا ہے کہ اس سے صوبہ پنجاب میں عمومی طور پر اور لاہور میں خاص طور پر امن عامہ کی صورتحال مزید بگڑ جائیگی۔ انہوں نے حکومت سے مطالبہ کیا کہ وہ اپنے فیصلے پر فوراً نظرثانی کرے۔ حکومت طاقت کے استعمال کی بجائے سیاسی حکمت عملی سے صورتحال کو قابو کرنے کی کوشش کرے۔ انہوں نے کہا عوامی تحریک کے کارکنوں کو یوم شہداء میں شرکت سے روکنا تنگ نظر پالیسی کا مظہر ہے جس کی وجہ سے صوبے میں شدید ردعمل ہوسکتا ہے۔ محاذ آرائی کی پالیسی سیاسی نظام کیلئے اسوقت سودمند ثابت نہیں ہوگی جبکہ ملک کے باقی تمام سیاسی قائدین جمہوریت کو ڈی ریل ہونے سے بچانے کیلئے سرتوڑ کوششیں کررہے ہیں۔