کراچی (کرائم رپورٹر+ این این آئی) شہر قائد میں ہفتہ کو فائرنگ اور حادثات میں بیوپاری سمیت 10 افراد جاں بحق ہوگئے۔ تفصیلات کے مطابق نیو کراچی صنعتی ایریا میں نامعلوم مسلح موٹر سائیکل سوار افراد کی فائرنگ سے 25 سالہ سبحان ہلاک اور 21 سالہ آصف ولد اختر زخمی ہو گیا۔ پولیس کے مطابق مقتول مویشیوں کا بیوپاری تھا۔ لیاری کے علاقے نیاآباد فلیٹس سے 21 سالہ فاطمہ زوجہ احمد کی نعش ملی۔ پولیس کے مطابق مقتولہ کو چھریوں کے وار کرکے قتل کیا گیا اور مقتولہ بچوں کے ساتھ فلیٹ میں اکیلی رہتی تھی۔ شرافی گوٹھ کے علاقے مانسہرہ کالونی میں نامعلوم موٹر سائیکل سوار افراد کی فائرنگ سے 22 سالہ کاشف جاں بحق ہو گیا۔ مقتول فیکٹری میں ملازمت کرتا تھا اور مظفر گڑھ سے آبائی تعلق تھا۔ گلستان جوہر تھانے کی حدود بلاک 15کچی آبادی میں 50 روپے کے تنازع پر بچے آپس میں لڑ پڑے۔ تلخ کلامی کے بعد 13سالہ بلال منیر نے 13سالہ محمد فیضان کو چھریوں کے وار کرکے قتل کر دیا۔ مقتول چھٹیا ں گذارنے رحیم یار خان سے اپنے والد کے پاس آیا ہوا تھا۔ دریں اثناء سرجانی ٹاؤن کے علاقے سیکٹر گیارہ ڈی میں زیر تعمیر مکان میں فرش کی گھسائی کرتے ہوئے کرنٹ لگنے سے 17سالہ شفیق جاں بحق ہوگیا۔ نیشنل ہائی وے لنک روڈ پر کنٹینر توازن برقرار نہ رکھتے ہوئے کار پر جاگرا جس سے کار میں سوار 2 افراد مستان شاہ اور 35سالہ نامعلوم شخص جاں بحق ہوگئے جبکہ 2افراد شدید زخمی ہوگئے۔ ڈرگ روڈ ریلوے لائن کراس کرتے ہوئے 30سالہ حرا ٹرین کی زد میں آکر جاں بحق ہو گئی۔ سائٹ بی تھانے کی حدود شیر شاہ غنی چورنگی کے قریب ٹریلر کی زد میں آکر موٹر سائیکل سوار 25سالہ ناصر خان جاں بحق ہوگیا۔ متوفی ضیاء الدین ہسپتال کلفٹن میں وارڈ بوائے تھا۔