لاہور ( سپورٹس رپورٹر) پاکستان باکسنگ فیڈریشن نے ایشین گیمز کی تیاری کے لئے پاکستانی نژاد برطانوی کوچ کی خدمات حاصل کر لیں۔ پاکستان باکسنگ فیڈریشن کے سیکرٹری اقبال حسین  کے مطابق 19 اکتوبر سے 30اکتوبر تک سائو تھ کوریا میں ہونے والی ایشین گیمز کے لئے پاکستانی نژاد برطانوی کوچ یعقوب حسین  25باکسرز کو دو ہفتے کی ٹریننگ کروانے کے لئے 25اگست سے کراچی میں جاری تربیتی  کیمپ جوائن کریں گے۔ انہوں نے بتایا کہ پی بی ایف ایشین گیمز کے لئے پہلے ہی چھ رکنی ٹیم کا اعلان کر چکی ہے جس میں محب اللہ49 کلو گرام ،محمد وسیم 52 ،نادر بلوچ 56،علی محمد60،عامر خان64اور ثناء اللہ 91کلو گرام شامل ہیں ۔پی بی ایف سیکرٹری نے کہاکہ انٹرنیشنل باکسنگ میں لیول 4کوچ یعقوب گزشتہ چار عشروں سے لندن کے مضافات میں اپنا باکسنگ کلب چلا رہے ہیں ۔کامن ویلتھ گیمز کے دوران میری یعقوب کے ساتھ ملاقات ہوئی جس کے دوران میں نے پاکستان باکسروں کی ایشین گیمز سمیت دیگر ٹورنامنٹ میں شرکت کے حوالے سے تیاریوں کی تفصیلات بتائیں۔