لاہور(سپورٹس رپورٹر+نمائندہ سپورٹس) چین میں جاری یوتھ اولمپک گیمز میں پاکستان ہاکی ٹیم نے اپنے دوسرے میچ میں جرمنی کو چھ دو سے مات دیدی۔ ننجنگ میں جاری گیمز میں پاکستان ٹیم نے جرمنی کے خلاف بھی شاندار کھیل کا سلسلہ جاری رکھا اور ٹورنامنٹ میں اپنی پوزیشن مستحکم کر لی۔ جرمنی کے خلاف کھیلے جانے والے میچ میں پاکستان یوتھ ٹیم کی جانب سے مبشر نے دو جبکہ محمد عتیق، نوہیز ملک، شان ارشان اور بلال محمود نے ایک ایک گول سکور کیا۔ پاکستان یوتھ ٹیم اپنا تیسرا میچ آج زیمبیا کے خلاف کھیلے گی۔ پاکستان ہاکی ٹیم کے کوچ محمد علی کا کہنا تھا کہ نوجوان کھلاڑیوں نے جرمنی کے خلاف میچ میں توقعات اور گیم پلان پر عمل کیا جس کی وجہ سے کامیابی ان کا مقدر بنی۔ یوتھ ٹیم اس وقت پورے ردھم میں نظر آ رہی ہے اگر اگلے میچز میں بھی اسی طرح پرفارم کرتی رہی تو وکٹری سٹینڈ تک رسائی آسان ہو جائے گی۔