لاہور(سپورٹس رپورٹر+نمائندہ سپورٹس)چین میں جاری یوتھ اولمپکس ہاکی ٹورنامنٹ کے آخری لیگ میچ میں پاکستان اور نیوزی لینڈ کے درمیان مقابلہ چھ چھ گول سے برابر رہا۔ پاکستان کی طرف سے محمد عتیق اور شان ارشاد نے دو دو جبکہ جنید کمال اور مبشر علی نے ایک ایک گول سکور کیا۔ پاکستان ٹیم کا کوارٹر فائنل میں ٹاکرا کینیڈا سے ہوگا یہ میچ کل روز ہفتہ کو کھیلا جائیگا۔ پاکستان یوتھ ہاکی ٹیم کے ہیڈ کوچ اولمپین طاہر زمان نے خصوصی گفتگو میں بتایا کہ پاکستان ٹیم نے نیوزی لینڈ کے خلاف اچھے کھیل کا مظاہرہ کیا ہے۔ میں ذاتی طور پر اس میچ میں کھلاڑیوں کی کارکردگی سے مطمیئن ہوں۔ طاہر زمان کا کہنا تھا کہ ٹورنامنٹ میں اگلے میچز سخت ہیں جس کے لیے بھرپور انداز میں میدان میں اتریں گے۔ پاکستان ہاکی فیڈریشن نے ٹیم کی کارکردگی پر کھلاڑیوں اور ٹیم مینجمنٹ کو مبارکباد پیش کی ہے۔