نیویارک(سپورٹس ڈیسک) پاکستانی ٹینس اسٹاراعصام الحق اوران کی پارٹنرایلا کدرتسیوا کویوایس اوپن کے مکسڈ ڈبلزکے دوسرے راونڈ میں شکست کا سامنا کرنا پڑا۔ٹاپ سیڈ سربیا کے نوواک جوکووچ، اینڈی مرے اورسیرینا ولیمزکی یوایس اوپن ٹینس چیمپیئن شپ میں کامیابیوں کا سفرجاری ہے۔ ومبلڈن چیمپئن پیٹرا کویٹووا تیسرے راونڈ میں اپ سیٹ شکست کے بعد ایونٹ سے باہر ہو گئیں۔نیویارک میں جاری سال کے آخری گرینڈ سلم ایونٹ کے مکسڈ ڈبلزکے دوسرے راونڈ میں اعصام اورکدرتسیوا کا مقابلہ تھا بھارت کے لی انڈرپیس اورزمبابوے کی کارا بلیک کی جوڑی سے۔ پیس اوربلیک نے پہلا سیٹ چھ ایک سے اپنے نام کیا لیکن اعصام اورکدرتسیوا نے دوسرا سیٹ چھ چارسے اپنے نام کرتے ہوئے مقابلہ برابرکردیا۔ تیسرے اورفیصلہ کن سیٹ میں انڈوزمبابوین جوڑی حاوی رہی اوراس نے دس چارسے فتح سمیٹتے ہوئے تیسرے راونڈ تک رسائی حاصل کرلی۔ اعصام الحق مینزڈبلزایونٹ میں اپنے پارٹنرروہن بوپننا کے ہمراہ پہلے راونڈ سے آگے نہ جاسکے تھے۔ مینز سنگلزمیں ورلڈ نمبرون نوواک جوکووچ نے لوکل فیورٹ سیم کیوری کوچھ تین، چھ دواورچھ دوسے مات دیکرچوتھے راونڈ تک رسائی حاصل کی۔ دوہزا ر بارہ کے چیمپیئن برطانیہ کے اینڈی مرے آندریکزنیتسووکیخلاف چھ ایک، سات پانچ، چارچھ اورچھ دوسے فتح سمیٹتے ہوئے پری کوارٹرفائنل میں پہنچ گئے۔ ویمنزسنگلزمیں سربیا کی کوالیفائرالیگزینڈرا کرونچ نے ومبلڈن چیمپیئن پیٹرا کویٹووا کا قصہ تمام کردیا۔ سربین کھلاڑی نے کویٹووا کیخلاف چھ چاراورچھ چارسیفتح سمیٹی۔دفاعی چیمپیئن امریکہ کی سیرینا ولیمزہم وطن لیپچنکوکوسٹریٹ سیٹس میں چھ تین اورچھ تین سے مات دے کرراونڈ آف سکسٹیں میں پہنچ گئیں۔