انچون (اے پی پی) 17 ویں ایشین گیمز فٹ بال ایونٹ میں شمالی کوریا نے پاکستان کو 2-0 گول سے ہرا دیا۔ شمالی کوریا کی ٹیم مسلسل دو میچ جیت کر گروپ ایف میں پوائنٹس ٹیبل پر سرفہرست ہے۔ جنوبی کوریا میں جاری میگا گیمز میں جمعرات کو کھیلے گئے فٹ بال ایونٹ کے گروپ ایف کے میچ میں پاکستان کا مقابلہ شمالی کوریا سے تھا۔ شمالی کوریا نے انتہائی شاندار کھیل پیش کرتے ہوئے پاکستان کو 2-0 گول سے ہرا کر مسلسل دوسری کامیابی حاصل کی، کھیل کے پہلے ہاف کے 40 ویں منٹ میں شمالی کوریا کے سو کیونگ نے گول کر کے اپنی ٹیم کو برتری دلائی جو پہلے ہاف تک برقرار رہی، دوسرے ہاف کے 67 ویں منٹ میں شمالی کوریا کے جانگ لنگ نے گول کر کے ٹیم کی برتری دوگنی کر دی جو کھیل کے اختتام تک برقرار رہی، شمالی کوریا نے پہلے میچ میں چین کو ہرایا تھا۔