لاہور (حافظ محمد عمران/نمائندہ سپورٹس) لاہور لائنز کی ٹیم چیمپئنز لیگ کے مین راؤنڈ میں بھی بہترین کارکردگی کا مظاہرہ کرے گی۔ تمام کھلاڑی بہترین کارکردگی دکھانے کا جذبہ رکھتے ہیں اور اس اہم ایونٹ سے بھرپور فائدہ اُٹھائیں گے۔ ان خیالات کا اظہار حیدرآباد دکن سے عمراکمل نے وقت نیوز کے پروگرام ’’گیم بیٹ‘‘ میں گفتگوکرتے ہوئے کیا۔ انہوں نے کہا کہ ٹیم انتظامیہ کا مکمل تعاون اور رہنمائی حاصل ہے۔ اب تک کی کارکردگی سے خوش اور مطمئن ہیں۔ کوئی میچ آسان ہے نہ کوئی حریف اور نہ ہی ہم پر کسی کا کوئی دباؤ ہے۔ کلکتہ نائٹ رائیڈرز کیخلاف صرف ایک پالیسی ہے کہ ہر حال میں فتح حاصل کرنی ہے۔ مثبت کرکٹ کھیلنی ہے اور جو آج پلان دیا جائیگا اس پر سو فیصد عمل کرنے کی کوشش کی جائیگی۔ لاہور لائنز کی ٹیم کے میڈیا منیجر رضا راشد نے گفتگو کرتے ہوئے کہا کہ وہ بروقت پاکستانی میڈیا سے رابطے میں رہتے ہیں اور تمام اپ ڈیٹس مہیا کرتے رہتے ہیں۔ اپنی پیشہ وارانہ ذمہ داریوں میں کوئی کوتاہی نہیں کی۔ اب تک تمام معاملات بہتر انداز میں چل رہے ہیں۔