اسلام آباد (این این آئی) وزیراعظم محمد نواز شریف نے افغانستان کے نومنتخب صدر اشرف غنی احمد زئی کو صدارتی الیکشن میں کامیابی پر مبارکباد دیتے ہوئے دورہ پاکستان کی دعوت دی ہے۔ افغانستان کے نومنتخب صدر کو لکھے گئے خط میں وزیراعظم نواز شریف نے کہا ہے کہ میں صدارتی الیکشن میں کامیابی پر آپ کو پاکستانی حکومت، عوام اور اپنی جانب سے دلی مبارکباد پیش کرتا ہوں۔ اس تاریخی مرحلے پر یہ اعلیٰ عہدہ سنبھالنا بڑا اعزاز اور عظیم ذمہ داری بھی ہے۔ آپ کو دورہ پاکستان کی خلوص دل سے دعوت دیتا ہوں امید ہے آپ اپنی اولین فرصت میں یہ دورہ کرینگے۔ آپ کا دورہ پاکستان ہمارے تعلقات کو نئی راہ پر لانے اور امن ترقی اور مشترکہ خوشحالی کی راہ پر گامزن ہونے کا موقع فراہم کرے گا۔
نواز/ اشرف غنی