میرانشاہ+ ہنگو+ راولپنڈی (نوائے وقت رپورٹ+ ایجنسیاں) شمالی وزیرستان میں آپریشن ضربِ عضب کامیابی سے جاری ہے۔ آپریشن ضربِ عضب کے دوران دہشت گردوں کے ٹھکانوں پر فضائی کارروائی میں 23 دہشت گرد ہلاک ہوگئے جبکہ انکی کئی پناہ گاہیں تباہ کردی گئیں جبکہ ہنگو کے علاقے قاضی پمپ کی پولیس چوکی پر دہشت گردوں کے حملے میں 3 پولیس اہلکاروں سمیت 4 افراد شہید ہوگئے۔ آئی ایس پی آر کے مطابق دہشت گردوں کیخلاف فضائی کارروائی غلام خان کے علاقے بندیگر میں کی گئی۔ ترجمان پاک فوج کے مطابق پیر کو آپریشن ضربِ عضب کے دوران شمالی وزیرستان کے علاقے غلام خان میں فضائی کارروائی کی گئی جس میں 23 دہشت گرد ہلاک ہوئے، اس دوران دہشت گردوں کی متعدد کمین گاہوں کو تباہ کردیا گیا ہے۔ ترجمان کے مطابق سکیورٹی فورسز کی جانب سے شمالی وزیرستان میں 12 جون کو آپریشن ضربِ عضب کا آغاز کیا گیا تھا اور اب تک 900 سے زائد ملکی و غیرملکی دہشت گردوں کو ہلاک کیا جاچکا ہے۔ شمالی وزیرستان کی تحصیل میرعلی کو دہشت گردوں سے خالی کرانے کے بعد سکیورٹی فورسز نے آپریشن کا دائرہ کار شمالی وزیرستان کے دور دراز علاقوں تک بڑھا دیا ہے۔ ادھر پیر کو پولیس کے مطابق ہنگو کے علاقے قاضی پمپ میں واقع پولیس چوکی سے اہلکاروں کی موبائل معمول کے گشت پر روانہ ہورہی تھی کہ ایک دوسری گاڑی میں سوار افراد نے آکر اچانک اندھا دھند فائرنگ کردی۔ فائرنگ کے نتیجے میں 4 افراد موقع پر ہی جاں بحق ہوگئے۔ جاں بحق ہونے والوں میں 3 پولیس اہلکار اور ایک راہگیر شامل ہیں۔ علاوہ ازیں پولیس کے سرچ آپریشن کے دوران درجنوں مشتبہ افراد کو گرفتار کرلیا گیا ہے۔ جاں بحق ہونے والوں میں خرم شہزاد، حاجی رحمان اور شاہد عمر شامل ہیں۔ حملہ آور فائرنگ کے بعد فرار ہونے میں کامیاب ہو گئے ۔ تینوں اہلکار شہر کے داخلی راستے پر لگائے گئے پولیس ناکے پر تعینات تھے۔ ڈی پی او ہنگو انور سعید کنڈی نے تصدیق کرتے ہوئے بتایا کہ پیر کے روز 8 بجے ہنگو کے نواحی علاقہ قاضی پمپ میں پولیس چیک پوسٹ پر نامعلوم دہشت گردوں نے فائرنگ کی جس کے بعد سرچ آپریشن میں 30 سے زیادہ مشتبہ افراد کو گرفتار کرکے تفتیش کے لئے نامعلوم مقام منتقل کردیا ہے۔ ایسے واقعات سے پولیس کے حوصلے پست نہیں ہوں گے۔ ادھر بنوں میں پولیس نے تباہی کا منصوبہ ناکام بنا دیا ہے اور بنوں ہوید روڈ پر نصب 5 کلوگرام وزنی ریموٹ کنٹرول پمپ برآمد کرکے ناکارہ بنا دیا ہے۔