جلسے اور دھرنے اتنے اہم نہیں جو چیز نواز شریف کا پیچھا کررہی ہے وہ ’’گو نواز گو‘‘ کا نعرہ ہے: اعتزاز احسن
لاہور(آن لائن) پاکستان پیپلزپارٹی کے سینیٹر بیرسٹر اعتزاز احسن نے وزیراعظم میاں محمد نواز شریف کو دوستانہ مشورہ دیتے ہوئے کہا ہے کہ جو چیز وزیراعظم کا پیچھا کررہی ہے وہ ’’گو نواز گو‘‘ کا نعرہ ہے وہ چند روز کیلئے عوام سے دور رہ کر گزارہ کریں۔ لاہور ہائیکورٹ میں میڈیا سے گفتگو کرتے ہوئے انہوں نے کہا کہ عمران خان کا جلسہ بڑا تھا لیکن بڑے سے بڑا جلسہ بھی کچھ روز کیلئے بھول جاتا ہے جلسے اور دھرنے اتنے اہم نہیں جو چیز نواز شریف کا پیچھا کررہی ہے وہ ’’گو نواز گو‘‘ کا نعرہ ہے۔ انہوں نے کہا اللہ کی شان ہے کہ عمران خان شیخ رشید کو چپڑاسی بھی نہیں رکھتے اور آج کوئی بات کرتے ہیں تو شیخ رشید کی مشاورت سے کرتے ہیں۔ شیخ رشید بتائیں کہ وہ آٹھ بار کس کے کہنے پر وفاقی وزیر رہے۔ دھرنوں سے استعفے نہیں ملتے۔ پارلیمنٹ نے بھی حکومت پر دبائو ڈالا لیکن پارلیمنٹ بھی وزیراعظم کے استعفے کی مخالف ہے۔
