لاہور میں مسلم لیگ ن کے ایم پی اے وحید گل سمیت کئی شہری ، گوجرانوالہ میں صنعتکار لٹ گیا
لاہور+ گوجرانوالہ (نامہ نگار+ نمائندگان+ نمائندہ خصوصی) صوبائی دارالحکومت کے مختلف علاقوں میں کئی وارداتوں کے دوران مسلم لیگ (ن) کے ایم پی اے وحید گل سمیت متعدد شہری لٹ گئے۔ ڈاکو وارداتوں کے دوران نقدی، طلائی زیورات، موبائل فون، گاڑیاں، موٹر سائیکلیں اور دیگر سامان لوٹ لیا جبکہ گوجرانوالہ میں ڈاکوئوں نے صنعتکار سے 52 ہزار روپے کی نقدی چھین لی۔ واردات کو سی سی ٹی وی کیمرے نے محفوظ کر لیا۔ تفصیلات کے مطابق کینٹ کے علاقہ میں موٹر سائیکل سوار 2 ڈاکوؤں نے مسلم لیگ (ن) کے ممبرپنجاب اسمبلی وحید گل سے موبائل فون چھین لیا اور فرار ہو گئے۔ ڈاکوؤں نے نواب ٹاؤن کے علاقہ جوہر ٹاؤن ایل بلاک کے رہائشی ملک منظور کے گھر گھس کر اہلخانہ کو گن پوائنٹ پر یر غمال بنا کر11لاکھ، کاہنہ موضع آصل سلیمان کے رہا ئشی بشیر کے گھر سے8 لاکھ نقدی، طلائی زیورات، موبائل فون اور دیگر سامان لوٹ لیا۔ ڈاکوؤں نے نواں کوٹ سی بلاک سبزہ زار میں سلمان کی فیملی سے6 لاکھ، ستوکتلہ میں اکرم کی فیملی سے5 لاکھ، جوہر ٹاؤن بی بلاک میں نواز اور اسکی بیوی سے3 مالیت کی نقدی، طلائی زیورات اورموبائل فون لوٹ لئے۔ ڈاکوؤں نے کاہنہ تبت روڈ میں مرزا شکیل سے 7 لاکھ کی ٹریکٹر ٹرالی، ٹاؤن شپ قبرستان کے قریب اقبال سے4لاکھ 25 ہزار، گر ین ٹائون باگڑیاں چوک میں بابر کی موبائل شاپ سے3 لاکھ کے موبائل فون اور نقدی، سندر میں واقع اسلم کی نرسری سے2 لاکھ اور پسٹل، مغلپورہ میںعرفان سے موٹر سائیکل، موبائل فون اور ہزاروں روپے، ساندہ راج گڑھ میں نسیم کی دکان سے 94 ہزار، شفیق آباد میں مون میڈیکل سٹور سے46 ہزار اور موبائل فون، گرین ٹائون سی ٹو میں رؤف سے 29 ہزار اور موبائل فون لوٹ لیا۔ چوروں نے گرین ٹائون ڈی ون کے رہائشی منظور الٰہی کے گھر سے5لاکھ روپے مالیت کی نقدی، زیورات اور دیگر سامان، مناواںمیں شفیق کی حویلی سے دو بھینسیں چوری کر لیں۔ چوروں نے نشتر کالونی سے سعادت علی، کوٹ لکھپت سے ڈاکٹر محمد عظیم، لیاقت آباد سے وحید، مزنگ سے ناصر ، گلشن اقبال سے معظم ، ڈیفنس اے سے ملک ریاض، ڈیفنس سے خالدکی کاریں جبکہ سمن آباد سے رفاقت علی، گلشن اقبال سے فرحت، نواب ٹائون سے مقبول، سبزہ زار سے شہزاد، ڈیفنس بی سے نفیس، نشتر کالونی سے شفیق، شادمان سے راشد، لیاقت آباد سے نعمان، نصیرآباد سے مہتاب، کوٹ لکھپت سے شہروز، نولکھا سے اظہر خان، قلعہ گجر سنگھ سے شاہد، شیرا کوٹ سے قمر عباس، نواں کوٹ سے سعید، اقبال ٹائون سے میں آصف، ساندہ سے شوکت علی، گلشن راوی سے اعجاز کی موٹر سائیکلیں چوری کر لیں۔ ادھر گوجرانوالہ میں ڈاکوئوں نے عیدی مہم تیز کر دی۔ سی سی ٹی وی فوٹیج نے پولیس کی کارکردگی کا پول کھول دیا۔ مقامی تاجر صنعتکار شیراز جی ٹی روڈ پر واقع نجی بنک سے52 ہزار روپے نکلوا کر موٹر سائیکل پر سوار ہو کر اپنی فیکٹری جا رہا تھا، موٹر سائیکل سوار دو مسلح ڈاکوئوں نے زبردستی روک لیا۔ اس دوران ایک ڈاکو صنعتکار کو پکڑ نے کیلئے چلتی موٹر سائیکل سے اترنے کی کوشش کے دوران سڑک پر گر گیا تاہم اس نے تیزی کے ساتھ تاجر کو دبوچ لیا اور گن پوائنٹ پر اس سے52 ہزار روپے نقدی، موبائل فون لوٹ لیا اور موقع سے فرار ہو گئے۔ ڈکیتی کی اس واردات کو قریبی لگے سی سی ٹی وی کیمرے نے بھی محفو ظ کر لیا۔ علاوہ ازیں تھانہ سبزی منڈی کے علاقہ جی ٹی روڈ پردو ڈاکوئوں نے نجی بنک سے4 لا کھ 75 ہزار روپے نکلوا کر نکلنے والے تاجر سے گن پوائنٹ پر نقدی، موبائل فون اور ضروری دستاویزات لوٹ لیں۔ مانگامنڈی سے نامہ نگار کے مطابق ڈاکو لاکھوں روپے نقدی اور 40 تولہ سونا کے زیورات لیکر فرار ہو گئے۔ محلہ طارق آباد کا فرزند علی اہل خانہ کے ساتھ گھر میں موجود تھا کہ تین موٹر سائیکل سوار ڈاکو گھر کے اندر داخل ہو گئے۔ کامونکے سے نامہ نگار کے مطابق ڈاکوئوں نے منڈیالہ روڈ پر حیدر کے گھر میں گھس کے اہلخانہ کو یرغمال بنا کر 22 تولے طلائی زیورات اور تین لاکھ روپے نقدی لوٹ لی۔
