لاہور+ حافظ آباد (نامہ نگار+ نمائندہ نوائے وقت) تیز رفتار کار نے نجی چینل کے فوٹو گرافر کو کچل کر مار ڈالا جبکہ حافظ آباد میں صحافی کو قتل کر دیا گیا۔ بتایا جاتا ہے کہ مقامی ٹی وی نیوز چینل کا فوٹو گرافر ممتاز کھوکھر سندر کے علاقے میں موٹر سائیکل پر جا رہا تھا، اس دوران اسے کار نے ٹکر مار دی جس سے وہ شدید زخمی ہو گیا۔ زخمی ممتاز کو طبی امداد کیلئے ہسپتال پہنچایا گیا مگر وہ جانبر نہ ہو سکا۔ پولیس نے مقدمہ درج کر کے متوفی کی نعش ورثاء کے حوالے کر دی۔  ممتاز کھوکھر نوائے وقت کے سینئر کارکن اشفاق احمد کھوکھر (شعبہ سی ٹی بی ٹی) کے بڑے بھائی، امتیاز کھوکھر، الیاس کھوکھر، عبدالستار کھوکھر کے کزن تھے۔ انکی نماز جنازہ آج صبح 10 بجے انکی رہائشگاہ مکان نمبر 14 بلاک 5B2 نزد اتوار بازار گرین ٹائون لاہور پر ادا کی جائیگی۔علاوہ ازیں حافظ آباد کے نواحی گائوں کالیکی منڈی میں صحافی ندیم حیدر اپنے سکول میں بچوں کو پڑھانے کے بعد دفتر میں بیٹھے ہوئے تھے جہاں موٹر سائیکل سوار نامعلوم مسلح افراد نے اندھادھند فائرنگ کرتے ہوئے اسے قتل کر دیا۔ واقعہ کی اطلاع پر پولیس کی بھاری نفری موقع پر پہنچ گئی اور علاقہ بھر کی ناکہ بندی بھی کر دی گئی۔ مقتول صحافی ندیم حیدر کا تعلق جہانگیر بھٹی گروپ سے تھا۔ جہانگیر اور بختاور گروپ کے درمیان عرصہ دراز سے جاری دشمنی کے نتیجہ میں اب تک 25سے زائد افراد قتل ہو چکے ہیں۔