کراچی (اے پی پی) 26 ویں پاکستان سکریبل چیمپئن شپ 12 اکتوبر کو کراچی میں منعقد ہو گی۔ پاکستان سکریبل ایسوسی ایشن کی سلور جوبلی تقریبات کے سلسلے میں ہر سال اس چیمپئن شپ کا انعقاد کیا جاتا ہے۔ ٹورنامنٹ آرگنائزر طارق پرویز کے مطابق پاکستان نے انٹرنیشنل اسکریبل ایونٹس میں کافی کامیابیاں حاصل کی ہیں، بالخصوص طور پر یوتھ ایونٹس میں اور اسی وجہ سے یہ کھیل تیزی سے ملک میں مقبول ہو رہا ہے۔ انہوں نے کہا کہ ہمیں اس بات پر فخر ہے کہ ہم نے یہ کامیابیاں حکومتی تعاون کے بغیر حاصل کی ہیں، اگر اس کھیل کو حکومت کی سرپرستی حاصل ہو جائے تو ہم انٹرنیشنل سطح پر مزید فتوحات حاصل کر سکتے ہیں۔ انہوں نے بتایا کہ عیدالاضحی کی چھٹیوں کی وجہ سے ایونٹ میں شرکت کے خواہشمند کھلاڑیوں کیلئے اپنے نام درج کرانے کیلئے 11 اکتوبر آخری تاریخ رکھی گئی ہے، چیمپئن شپ میں شریک کھلاڑیوں کو چھ مختلف کیٹگریز میں تقسیم کیا جائے گا۔