لاہور(نمائندہ سپورٹس +سپورٹس رپورٹر) پاکستان اور فلسطین کی ٹیموں کے درمیان فیفا ڈے کے حوالے سے میچ کل پنجاب فٹبال سٹیڈیم لاہور میں کھیلا جائیگا۔ اس سلسلہ میں مہمان ٹیم آج بروز ہفتہ کو لاہور پہنچے گی۔ پاکستان ٹیم کے ممکنہ کھلاڑیوں کا مختصر تربیتی کیمپ لاہور میں جاری ہے۔ قومی ٹیم کے کوچ شملان، کھلاڑی احمد اور احسان اﷲ کا کہنا ہے کہ فلسطین کے خلاف فیفا ڈے کے لیے پوری طرح تیاری مکمل ہے۔ انشااﷲ میچ جیت کر قوم کو اچھی خبر دینگے۔ کوچ شملان کا کہنا تھا کہ ایشین گیمز میں شرکت کے علاوہ دورہ بھارت اور بحرین کی وجہ سے کھلاڑی پوری تیاری میں ہیں۔ اس بات کی فکر نہیں کہ فلسطین ٹیم بھارتی ٹیم کو شکست دیکر آ رہی ہے کوچ کا کہنا تھا کہ پاکستان ٹیم بھی حال ہی میں بھارت کے خلاف سیریز بہتر گول ایوریج پر جیت چکی ہے۔ تمام کھلاڑی مکمل فٹ اور بھرپور فارم میں ہیں۔ بحرین سے تعلق رکھنے والے قومی کوچ شملان کا کہنا تھا کہ پاکستان ٹیم کے کپتان کلیم اﷲ اور صدام حسین بیرون ملک سے آج پاکستان پہنچ کر ٹیم کو جوائن کرینگے۔