اسلام آباد (اے پی پی) پاکستان بلائینڈ کرکٹ کونسل چوتھے بلائنڈ کرکٹ کپ کیلئے ٹیم اور مینجمنٹ کا اعلان 15 اکتوبر کو سفید چھڑی کے تحقظ کے عالمی دن کے موقع پر کرے گی۔ پاکستان بلائنڈ کرکٹ کونسل کے ذرائع نے اے پی پی کو بتایا کہ عالمی بلائینڈ کرکٹ کپ کی تیاری کیلئے قومی کھلاڑیوں کا تربیتی کیمپ لاہور میں ختم ہوگیا ہے جس میں 32 کھلاڑیوں نے شرکت کی۔ تربیتی کیمپ سے ورلڈ کپ کیلئے 16 باصلاحیت کھلاڑیوںکو شارٹ لسٹ کر لیا گیا ہے تاہم اس کا باضابطہ اعلان 15 اکتوبر کو کیا جائے گا۔ ذرائع نے بتایا کہ عالمی بلائنڈ کرکٹ کپ کیلئے قومی کھلاڑیوں کا انتخاب میرٹ پرکیا ہے اور وہ توقع رکھتے ہیں کہ ورلڈ کپ میں قومی ٹیم شاندار کارکردگی کا مظاہرہ کرکے ٹائٹل کا دفاع کریگی۔ ذرائع نے بتایا کہ پاکستان بلا ئنڈ کرکٹ کونسل ورلڈ کپ کیلئے ٹیم مینجر اور ٹرینر کا اعلان بھی 15 اکتوبر کو کریگا جس میں منیجر کیلئے تین جبکہ ٹرینر کیلئے دو نام سامنے آئے ہیں۔