4 خودکشیاں: گھریلو جھگڑے پر قصور، فیروز والا میں 2 نوجوانوں نے زندگی ختم کر لی
قصور + فیروز والا + شیخوپورہ (نامہ نگار + نمائندہ نوائے وقت + نامہ نگار خصوصی) مختلف وجوہات پر 4 افراد نے زندگی کا خاتمہ کرلیا۔ فیروز والا میں جی ٹی روڈ کی آبادی قذافی پارک میں محنت کش ہاشم نے گھریلو جھگڑے سے دلبرداشتہ ہو کر زہر کھا لیا۔ ورثاءنے پولیس کارروائی نہ کروائی۔ بتایا گیا ہے کہ میاں بیوی کے درمیان جھگڑا ہوا جس پر ہاشم نے زندگی ختم کرلی۔ قصور منڈیاں والا روڈ پرانی منڈی پتوکی کے محمد ابرار نے روزمرہ کے گھریلو جھگڑے سے تنگ آکر گندم میں رکھنے والی زہریلی گولیاں کھاکر خودکشی کرلی۔ شیخوپورہ میں تھانہ شرقپور کے علاقہ سالارپور میں گھریلو ناچاقی کی بناءپر 32 سالہ محمد حسین نے زہر کھا لیا۔ متوفی کی شادی دس برس قبل ہوئی تاہم ان کے ہاں اولاد نہ ہو سکی جس کی بناءپر دونوں میاں بیوی میں اکثر جھگڑا رہتا تھا اور گزشتہ روز بھی محمد حسین نے اولاد نہ ہونے سے دلبرداشتہ ہوکر زہریلی گولیاں کھا لیں۔ چک امرو میں عناےت پور گروٹہ کا محمد اویس شکرگڑھ محنت مزدوری کے سلسلے میں مقیم تھا۔گذشتہ روز اسکا گھر میں اپنی بیوی سے جھگڑا ہوا دلبرداشتہ ہو کر اس نے زہریلی گولیاں کھا کر موت کو گلے لگا لیا۔
زندگی ختم
