پشین + خضدار (نوائے وقت رپورٹ+ نیوز ایجنسیاں) پشین میں ٹوبہ کاکڑی کے علاقے میں ڈاکٹر کو قتل کر دیا گیا۔ نجی ٹی وی کے مطابق نامعلوم افراد نے کلینک پر حملہ کر دیا اور کلہاڑیوں کے وار کرکے ڈاکٹر کو قتل کر دیا۔ ادھر خضدار کے علاقے میں نامعلوم افراد نے کوچ پر فائرنگ کر دی جس سے ایک مسافر زخمی ہو گیا، ڈرائیوروں نے گاڑیاں روڈ پر کھڑی کرکے شدید احتجاج کیا۔ خضدار کے علاقے وہیر میں نامعلوم افراد نے کوئٹہ سے کراچی جانے والی مسافر کوچ پر فائرنگ کر دی جس کے نتیجے میں ایک مسافر زخمی ہو گیا اور کوچ کے ٹائر پھٹ گئے۔ ڈرائیوروں کے احتجاج کے باعث ہر قسم کی ٹریفک معطل ہو گئی اور سڑک کے دونوں جانب گاڑیوں کی لمبی لمبی قطاریں لگ گئیں، ڈرائیوروں نے مطالبہ کیا کہ ہمیں تحفظ فراہم کرتے ہوئے واقعہ میں ملوث ملزمان کو گرفتار کرکے سزا دی جائے۔ علاوہ ازیں گزشتہ روز وڈھ کے علاقے توک کے نزدیک پیر نتھن شاہ کے مزار کو نامعلوم افراد کی جانب سے دھماکہ خیز مواد سے اڑانے کی کوشش کی گئی، دھماکہ خیز مواد زوردار دھماکے سے پھٹ گیا جس کے نتیجے میں ایک کمرہ منہدم ہو گیا، دھماکے سے مزار کو بھی نقصان پہنچا، دھماکہ کی اطلاع ملتے ہی لیویز کا عملہ موقع پر پہنچ کر کارروائی شروع کر دی۔