لاہور(سپورٹس رپورٹر+نمائندہ سپورٹس) پاکستان کرکٹ بورڈ کے زیر اہتمام جاری ہائر قائداعظم ٹرافی گولڈ کا آٹھواں مرحلہ مکمل ہو گیا۔ اسلام آباد لیپرڈز نے پشاور پینتھرز کو شکست دیدی ۔ قذافی سٹیڈیم لاہور میں واپڈا اور پورٹ قاسم کی ٹیموں کے درمیان کھیلا جانے والا میچ ہار جیت کے فیصلے کے بغیر ختم ہو گیا۔ میچ کے آخری روز پورٹ قاسم کی ٹیم نے 39 رنز دو کھلاڑی آوٹ سے اننگز کا دوبارہ آغاز کیا۔ پورے دن کے کھیل میں پورٹ قاسم کی ٹیم میدان میں رہی اور پوری ٹیم 303 رنز بنا کر آوٹ ہو گئی۔ نمایاں کھلاڑیوں میں خالد لطیف نے 95، عمر امین نے 50 اور عبدالروف نے 43 رنز بنائے۔ جس کے بعد میچ کا اختتام بغیر کسی فیصلے کے ہوا۔ ڈائمنڈ گراونڈ اسلام آباد میں نیشنل بنک اور یو بی ایل کی ٹیموں کے درمیان میچ کا بھی نتیجہ نہ نکل سکا۔ مرغزار گراونڈ اسلام آباد میں سوئی نادرن گیس پائپ لائن اور زرعی ترقیاتی بنک ٹیموں کے درمیان میچ بغیر کسی فیصلے کے ختم ہو گیا۔