کراچی (نوائے وقت رپورٹ) شہر قائد کے مختلف علاقوں میں جمعہ کے روز پرتشدد واقعات میں ا یم کیو ایم کے 2 کارکنوں سمیت 5 افراد قتل، لیاری میں 5 گینگسٹرز مقابلوں میں مارے گئے۔ تفصیلات کے مطابق لیاری گل محمد لین میں گذشتہ رات رینجرز نے پھر آپریشن شروع کیا فائرنگ کے تبادلے میں بابا لاڈلہ گروپ کے جرائم پیشہ افراد دانیال برگر، سمیر کیچر، رضوان بلوچ اور انکا ساتھی مارے گئے۔ ملزموں کے قبضے سے ایک یرغمالی خاندان کو بازیاب کرا لیا گیا۔ عثمان آباد میں گینگسٹر فیاض عرف کالا پٹھان مارا گیا۔ ادھر ملیر باغ کے علاقے میں ایک گھر سے میاں بیوی کی نعشیں برآمد کر لی گئیں دونوں کو تیز دھار آلے سے قتل کرنے کے بعد نعشیں فریزر میں چھپائی گئی تھیں تاہم دونوں کی شناخت ظاہر نہیں کی گئی۔ علاوہ ازیں کورنگی کے علاقے عوامی کالونی میں فائرنگ سے ایک شخص ہلاک ہو گیا جس کی فوری شناخت معلوم نہ ہو سکی۔ اورنگی ٹاؤن چشتی نگر میں فائرنگ سے ایم کیو ایم کے دو کارکن شہباز اور شاہد جاں بحق ہو گئے۔